Distribución, Produción e Servizos Culturais.

SES, considerada como a revolución da actual escena músical galega, prosegue a presentación do seu último traballo, 'Tronzar os valos'

Un terremoto asolou nos últimos anos a música galega e moveu todos os marcos establecidos. SES segue a medrar en base á súa marca da casa: enerxía ilimitada, actitude punk e potencia escénica impoñente. Nestes momentos está a amosarlle ao mundo o seu terceiro traballo, 'Tronzar os valos', no que mestura en doses axeitadas os ingredientes dunha fórmula que consegue un resultado orixinal e xenuíno: rock'n'roll, tradición oral galega e ecos da canción latinoamericana.

Este terceiro disco da cantora bergantiñana suma as enerxías do rock e da tradición que leva nas veas, xunto coa canción de autor en doce temas de beleza e combate. Os valos desaparecen e as rúas deixan de estar prohibidas no novo traballo discográfico de SES. Rockeira e cantareira, comprometida e libre, sentimental e enérxica. Estamos en tempo de "Tronzar os valos", de responder con música e ideas, con ilusión e contra o abatemento.

Unha transfusión de entusiasmo galego contra o conformismo paralizante. Tronzar os valos é unha afirmación ética e musical extraordinarias. Recoméndoa moi vivamente. Marabilla de Sés.

Manuel Bragado

Visita a web

BERLAI é un proxecto moi persoal de Xiao Berlai que aúna música, poesía e banda deseñada.

Berlai é o primeiro proxecto do Xiao Berlai (Fía na Roca), que uniu o seu talento musical á creatividade do ilustrador Ernesto G. Torterolo para contar unha historia de soños e amores imposibles en fomato libro-cd.

'Desconhecido' é o seu primeiro froito. Un collage de cancións, debuxos, poemas e secuencias, cunha narrativa paralela de ilustracións, música e poesía. É a historia real dun home descoñecido, solitario, que preferiu vivir a súa vida como se fose un soño. Unha historia que combina unha mestura explosiva de realismo suxo, cru e obsceno co lirismo máis sensible. Onde o romantismo e a historia de amor non conseguen escapar do sexo, da loucura e do desespero. E onde se transforman, no plano musical, en pop-rock con pingas de trad ou mesmo de ska, que nos traen mensaxes intimistas e tamén comprometidas.

En directo, Berlai ofrece un espectáculo único onde se combina a música (cunha banda de cinco artistas), a voz de Xiao e os debuxos de Torterolo para contar a historia de 'Desconhecido'.

Visita a web

Balakandra nace en San Sadurniño a principios do ano 2004 no seo do mítico grupo Saraibas, froito das inquedanzas musicáis de varios dos seus membros que trataban así de dar renda solta aos seus coñecementos de outros estilos e técnicas musicáis.

En Febreiro de 2012 a banda grava o seu primeiro disco nos estudos "A Ponte" de Santiago de Compostela baixo a produción de Tomás Ageitos.

Dificil sería poñer unha etiqueta ó que nos ofrece Balakandra, 6 músicos de idades e procedencias moi dispares, letras comprometidas coa nosa sociedade e os nosos corazóns, a súa música e unha viaxe polas músicas do mundo con paradas no country e o bluegrass do sur dos EEUU, nos sons latinos dende Brasil ata Cuba, nos clubes de jazz de New York e nos frenéticos ritmos do este de europa, unha longa viaxe coa millor locomotora, o folk galego. Con todo isto, os concertos de Balakandra non deixan indiferente a ninguén, atrapando ó público nesta fermosa viaxe.

Visita a web

SONIA LEBEDYNSKI presenta o seu primeiro disco en solitario, 'Deserto de centos'.

Sonia bota a andar a súa carreira en solitario con 'Deserto de centos' logo de ser a 'front woman' de Fía na Roca e colaborar en múltiples iniciativas musicais. Estamos diante dun disco de autora -forneado xunto co brasileiro Sérgio Tannus- que é resultado de todas as músicas das que foi bebendo ao longo súa traxectoria musical e vital: trad, folc, funk, pop, música brasileira...

'Deserto de centos' é unha viaxe iniciática cara a un horizonte por descubrir. É o sedimento das músicas escoitadas e cantadas, dos proxectos dos que fixo parte, das persoas e dos lugares que coñeceu, dos versos que leu e que escribiu. Aí está todo o seu universo sonoro e vital.

Visita a web

'O poder do arcabuz', de Quique Peón Cía é o maior espectáculo de danza galega das últimas décadas.

'O poder do arcabuz' é un espectáculo musical cun cento de artistas en escena creado por Quique Peón en colaboración con Xacarandaina, con 35 bailaríns, 20 músicos e 40 persoas no coro. Na súa estrea dobre en decembro de 2015 no Teatro Colón da Coruña colgou o cartel de 'entradas esgotadas', e acadou unanimidade entre a crítica.

'O Poder do Arcabuz' é unha historia sobre as inxustizas e o poder que recrea a Revolución Irmandiña, a maior revolta europea do século XV. Neste espectáculo o autor utiliza o arcabuz como metáfora do poder e dos cartos para crear un musical no que se fusionan distintas artes escénicas: danza tradicional e contemporánea, música e teatro.

O último espectáculo da compañía do artista galego Quique Peón, con Xacarandaina, músicos e voces de toda Galicia, sorprendeu por novidoso, rompedor e diferente.

Selina Otero, Faro de Vigo

Visita a web

Voadora nace en 2007 integrada polo actor-músico Hugo Torres, o produtor-realizador-músico José Díaz e a directora-actriz-artista plástico Marta Pazos. Voadora é unha estrutura con sede en Santiago de Compostela pero o seu espírito nómade e a súa ansia de colaboración con outros artistas levoulle a desenvolver sempre os seus proxectos e residencias artísticas entre Portugal e España.

Os seus traballos de investigación en creación contemporánea caracterízanse por un importante compoñente musical, estético, sorpresivo e evocador. A partir da música en vivo, a imaxinación, a ironía e o movemento, Voadora constrúe unha linguaxe moi persoal que foxe do argumental para mostrarnos que existe unha trama das sensacións, dos espazos, das emocións.

Voadora recibe en 2013 o Premio da Crítica de Galicia na modalidade de Artes Escénicas e Audiovisuais. O xurado decide outorgar o premio por unanimidade destacando a súa linguaxe baseada na musicalidad, o traballo realizado pola procura de novos públicos, polas novas formas de produción e pola capacidade de unir diferentes sistemas culturais tendendo pontes. Pero tamén pola capacidade de asumir riscos e ademais por ser simpáticos.

En 2015 o Festival Alternativo de Artes Escénicas de Vigo homenaxea á compañía cunha retrospectiva dos mellores traballos da compañía.

En leste mesmo ano os traballos escenográficos da compañía "Waltz" e "A Tempestade" preséntanse na Quadrienal de Praga PQ´15. o evento internacional máis importante do mundo dedicado ao deseño da escenografía, a arquitectura teatral, o vestiario, a iluminación e o son.

Visita a web

A Coruña é unha cidade cosmopolita e cun crecente ambiente sociocultural. O gusto pola música en directo é un dos puntos fortes dunha poboación de case 300.000 habitantes, que contaba, até agora, con pequenas salas de concertos e grandes recintos, pero que carecía dun espazo de dimensións e condicións apropiadas para albergar espectáculos de formato medio.

Con esta idea nace a Sala Finisterrae, un espazo no centro da cidade co aforamento e as condicións técnicas necesarias para acoller espectáculos de gran calado, ofrecendo así unha nova alternativa ao lecer na cidade, e a posibilidade de facer chegar á Coruña directos e artistas que antes non atopaban o espazo adecuado.

A Localización

A sala Finisterrae sitúase nas instalacións Hesperia Finisterre, un hotel emblemático da Coruña que abriu as súas portas no ano 1948 e actualmente é o único hotel 5 estrelas da cidade.

Está situado no centro da Coruña, en pleno paseo marítimo, a escasos metros do novo Palacio de Congresos e xunto ao Porto deportivo.

A menos de 5 minutos camiñando, atópase o centro empresarial da cidade, a zona comercial para as mellores compras, o centro histórico, os restaurantes máis coñecidos e as zonas de tapeo con maior ambiente da cidade; as praias están a tan só 700 metros.

Dentro deste inigualable marco, a sala Finisterrae preséntase como un espazo idóneo para acoller grandes eventos culturais, tanto polas súas dimensións e características técnicas como pola súa localización.

O Proxecto

O espazo situarase no coñecido Salón Vitoria, con capacidade ao redor de 1000 persoas de aforamento. Nace con vocación de tentar aglutinar xéneros musicais diversos e atractivos, como o pop, rock, indie, blues ou jazz.

Os artistas en xira e o seu poder de convocatoria marcarán as citas dunha axenda que esperemos sexa o máis ampla e atractiva posible.

Visita a web

A Feira das Industrias Culturais de Galicia é moito máis que un encontro profesional. Culturgal é unha romaría á que acoden cada ano miles de persoas para coñecer de primeira man as novidades editoriais, o último en música, o glamour do audiovisual, a maxia das artes escénicas, os avances das novas tecnoloxías e mesmo ás propostas máis marxinais en tres días de actividade sen tregua. Tres intensos días de traballo conxunto que converten a Feira nun lugar de encontro privilexiado para os axentes do sector, un espazo para a reflexión e a aprendizaxe, no que intercambiar experiencias e imaxinar novos proxectos baseados na colaboración e no apoio mutuo.

Culturgal está organizado por unha entidade da que forman parte as asociacións profesionais máis representativas do sector: Asociación Galega de Editores (AGE), Asociación Galega de Empresas de Artes Escénicas (Escena Galega), Asociación Galega de Produtoras Fonográficas (Agaphono), Empresas Galegas Adicadas a Internet e ás Novas Tecnoloxías (Eganet), Asociación Galega de Produtoras Independentes (Agapi). A Feira conta co patrocinio da Xunta de Galicia, a través da AGADIC e da Secretaría Xeral de Política Lingüística, do Concello de Pontevedra, do Ministerio de Educación, Cultura e Deporte e conta coa colaboración de máis de 30 entidades e empresas. No campo das industrias culturais, Culturgal é sen dúbida o proxecto coa rede máis ampla de colaboradores institucionais, asociativos e empresariais.

Culturgal é a casa da cultura en Galicia.

Visita a web

A mediados de xullo, en Malpica, celébrase este concerto de rock. Nos últimos anos, grupos como SES, Siniestro Total, Os Diplomáticos de Monte Alto, Os Papaqueixos, Narco ou Los Enemigos pasaron por este escenario grazas á inestimable labor de varios mozos da localidade, que coa súa Asociación "Tralla", tentan dinamizar a vida do municipio.

Nas últimas edicións, o festival deu un gran salto cara adiante, chegándose a xuntar 4000/5000 persoas nos concertos nocturnos.

Durante o día sucédense por todo o pobo, as actividades relacionadas co festival, como unha sardiñada popular e varios grupos tocando polas rúas.

Visita a web